Засгийн газраас хэрэгжүүлж буй “Төрийн түрээсийн орон сууц” хөтөлбөрийн бүртгэл гуравдугаар сарын 21-ний өдрөөс эхэлсэн. Бүртгэлийг ил тод, шуурхай явуулах зорилгоор иргэдийг зорилтот долоон бүлгийн ангилалд хувааж бүртгэсэн. Өнөөдөр бүртгэлийн сүүлийн өдөр бөгөөд өрх толгойлсон эрэгтэй, эмэгтэй болон хөгжлийн бэрхшээлтэй иргэд бүртгүүлэх юм.
Харин гуравдугаар сарын 31, дөрөвдүгээр сарын 01-ний өдрүүдэд доорх ангиллаас бүртгэлд хамрагдаж амжаагүй иргэдийг нэмэлтээр бүртгэнэ. Журмын шаардлага хангаж бүртгэлд хамрагдсан иргэдийн тоо түрээсийн орон сууцны квотоос давсан тул сугалаагаар сонгохоор болсон.
Журмын шаардлага хангаж бүртгэлд хамрагдсан иргэдийн материалыг дахин хянан шалгаж шүүсний дараа сугалааг явуулна. Түрээсийн орон сууцад хамрагдахаар гуравдугаар сарын 21-30-ны өдрүүдэд нийт 3359 иргэн хүсэлт гаргаснаас шаардлага хангасан 1443 иргэн бүртгэлд хамрагджээ.
|